投票決定邊個去死（下）
上集：https://bit.ly/3788K1k
我鍾意做武神嘅生活，日頭正常返工，夜晚就上網睇吓，今日有咩人被提名，估吓我今個月要殺邊個。
殺人後，等死訊被公佈，我就可以去享受讚美同歡呼，大家都當我神咁拜。
都有少少人會辱罵我，我諗係死者家屬，但喺海量嘅讚美面前，少少辱罵不值一提。
我甚至唔駛開小號反駁，因為我嘅支持者會自動冒出嚟，全力對抗反對我嘅人。
一切都好順利，直到有一次，我出街嗰陣，同個阿婆起咗爭執，俾人拍咗片擺上網，標題係「後生仔蝦阿婆」。
條片引起咗少少討論，有人起我底，砍又未至於上熱門，我都冇太上心。
過幾日，我居然喺「死亡投票網」度，見到有人提名「龍小強」，係我嘅真名。
我冷笑一聲，隨手刪咗呢個提名。
但我估唔到，呢件事會掀起軒然大波。
一直以嚟，「死亡投票網」開放畀所有人提名，只要提供足夠資料，你可以提名耀眼嘅明星，都可以提名平凡嘅鄰居，只不過提名平凡人，唔會得到足夠票數啫。
即係話，我從來冇刪過任何一個提名。
依加「龍小強」嘅提名被刪，提名人將呢件事公佈出嚟，馬上引起大家嘅熱烈討論。
點解呢個提名會被刪？唔通龍小強就係「死亡投票網」嘅話事人？
就算唔係話事人，都係話事人嘅親友，個提名先會被話事人刪。
睇到呢啲討論，我先知道我做錯決定，假如我任由個提名留低，以我嘅知名度，根本唔會有足夠票數。
可惜，我只有死亡筆記，冇時光倒流器。
呢個話題愈演愈烈，「後生仔蝦阿婆」只係茶餘飯後嘅笑談，「死亡投票網話事人」就係全城焦點。
我被起底、被追訪，甚至被跟蹤、收恐嚇信。
我唔知騷擾我嘅人，係之前死者嘅家屬，定係企圖控制「死亡投票網」嘅權貴。
我只知道，我嘅生存受到極大威脅。
而且，網民唔再好似以前咁支持我。
我未現身前，佢哋當我神咁拜。
我被起底後，佢哋發現我只係一個普通人，有弱點、有醜態，於是大家努力發掘我嘅缺點，仲有啲所謂前女友出嚟爆料。
我難以置信地望住網上對我嘅評論，我身上每個缺點被無限放大、攻擊，甚至無中生有，我好似變成咗全世界最衰嘅人。
「死亡投票網」日日都有人提名我，無論我刪幾多次，都會繼續有人提名。
我唔再浪費時間去刪提名，跟住我嘅「抵死」票數就高速上升。
網民討論緊，如果「死亡投票網」嘅話事人成為「每月之星」，佢會唔會自殺？
我唔知點算好，我一直相信，大家投票話「抵死」嘅人，就係真正嘅壞人。
依加嘅情況，唔通我先係壞人？
我幫社會清除咗咁多人渣，點解大家仲會話我係壞人？
隨住我嘅「抵死」票數上升到第一名，我既失望，又後悔，成日懷疑自己之前係咪做錯咗。
更令我擔憂嘅係，網上出現咗一種言論，有人話，就算我排第一，我肯定唔會自殺，所以佢哋呼籲大家，一齊殺死我，咁先符合「死亡投票網」嘅公平原則。
加埋無休止嘅騷擾同跟蹤，我愈嚟愈驚，驚自己真係會被殺死。
呢個時候，我收到一個訊息，係朋友帶畀我嘅。
有個有錢佬想包起「死亡投票網」，我唔再搞投票，每個月只將佢提供嘅目標殺死，就可以得到豐厚嘅酬金。
同訊息一齊嚟嘅，仲有一大筆錢，當係「誠意金」。
個有錢佬話，可以幫我辦埋移民手續，去國外開展新生活，擺脫呢度嘅麻煩。
我唔知個有錢佬嘅身份，我只知道，如果我應承咗佢，我就會成為我最不恥嘅人，一個為咗錢而濫殺無辜嘅人。
正義，唔會再同我有關係。
我好糾結，我一路思考，一路上網，但一上網，又見到好多人鬧緊我，講到我係全世界最惡毒嘅人咁。
呢一刻，我搖擺不定嘅心思，終於得到答案。
我根本冇咁衰，世人都已經當我係衰人。
咁我不如索性做個衰人，反而冇咁冤枉。
我關咗「死亡投票網」，拎住我嘅死亡筆記去移民。
同時，我將我過往堅持嘅正義，徹底放低。
批評，可以令人進步。
但過於苛刻嘅批評，只會令人放棄。
壞人唔會因為批評而變好，好人卻會因為批評而懷疑正義。
—完—
將專頁設定為「搶先看」/ "See first"，最新故仔馬上睇！
新書《筍工重生高科技》已經出版了，現正發售中，
詳情可點擊這裡：https://bit.ly/32hgoSN
你的支持是我最大的動力！
#短故 #短篇 #小說 #陳美濤 #廣東話 #粵語 #tomatochan #投票決定邊個去死
Search